Chalut mes gins ! Cha comminche à sintir bion ches vacinches pou quéques uns ! Dès que ches premiers jours d’euch mois d’juillet is arriv’tent, te peux constater un grind trinsvas’mínt dine de ch’te loi d’ches vases communicints. Ainchi, et te vas l’conchtater ti-même, t’as ches villes qui ch’vid’tent et ches autoroutes qui ch’rimplich’tent ! In annonche auchi eune chur-fréquintachion d’chertains indrots…

In tout cas, ch’est ch’que chertains is aurotent querre à avoir. Bin intindu, mes gins, j’veux parler de ch’te TVA qui baich’te dins ches restaurints. Annonché com’ ch’t’armète miracle d’pis des années pou contrer tous ches indrots d’bouffe rapite. Te t’rinds compte, ti, quind te vas minger des moules-frites, cha t’coût’ra moins quer. Quind t’iras boire un tiot jus, cha t’coût’ra moins quer auchi ! Par conte, j’te l’dis toud’chuite, pach’que j’in vos qui trépign’tent d’impachienche, chi te veux tin tiot jaune ou eune bionne bière, i t’in coût’ra toudis auchi quer de t’carver ! Mes gins, ch’est à causse d’Modérachion. Com’ t’es toudis obligé d’faire aveuc li quind te veux boir’te un cop. Ch’te TVA réduite, ch’est même pon in rêfe ! Pon d’rabais pou ches chervices d’echcorte (boy ou girl, ch’est ti qui vos) !

Partint su un bion sintimint, in va même te dir’re que, même chi ch’prix qu’te vas payer i n’baich’te pon, cha permettra d’miux payer ches personnels. Te m’diras, mi, j’sus prête à payer m’porchion d’moules-frites l’même prix, chi ch’ti qui l’amèn’te, à m’tape, i gagn’te miux ch’vie. Pach’que, faut bin l’arconnaîte, mes gins, cha n’est pon un métier d’tout arpos. In pus, t’es complèt’mint décalé par rapport à l’ress’ d’euch monte. D’jà, et cha même l’pus simplet i va comprinte, te n’peux pon minger à ches mêmes heures. A moins d’pluquer dins ches achiettes, mais cha n’el fait pon vraimint… In comprind fachil’mint que gramint d’gins i préfèr’tent travaller dins ches bureaux. Même chi, à m’mote, i y a d’jà eune churpopulachion. Par conte, j’sus gramint moins convaincu qu’cha va permette à ches restaurateurs d’imbaucher pus d’gins. Ch’calcul i va ête vit’ fait. Quind te dos payer chinquinte pou chint d’taxes pou un salaire d’miux, i va falloir in faire des couverts chupplémintaires !

Cor’ un truc qui m’turlupin’te. J’espèr’te que t’auras eune réponche à m’donner pou faire avincher min affaire. Te prinds un jus, ch’est eune TVA chinq chinq. Te prinds un whisky, ch’est eune TVA diche-neuf chix. Ch’i t’prind l’idée d’comminder un Irish-coffee, quo qui ch’pach’te ? Bah ! In théorie, cha d’vient eune boichon alcoolisée, donc, ch’est diche-neuf. Ouais, mais tin café, dins ch’cas, i n’a pon baiché in TVA et pourtint i y in a pus que d’euch whisky. Je n’osse même pon pinser à comminder des crêpes Suzette. Quo qui va ch’pacher ? v’là ch’scénario :

—    Alles coûtent combien tes crêpes Suzette ?

—    Cha dépind !

—    Cha dépind ? Mais cha dépind d’quo ? D’em guiffe ; ch’est cha ?

—    Nin, nin, nin ! Cha dépind de ch’Grind Marnier. In in met eune bionne rasate et in fait flimber ! Chi tout l’alcool i brûl’te, te s’ras facturé à chinq chinq et cha t’coût’ra chept euros. Ch’i n’brûl’te pon, cha s’ra pus cher.

—    Et ch’i n’brûl’te pon complèt’mint, j’fais appell’te à un expert comptape qui va m’faire un prévisionnel in fonc’chion d’euch degré qui rechte ! In n’a pon fini d’attinte quind in va vouloir payer ch’t’addichion !

Mes gins, te dos bin t’douter qu’em démonstrachion, ch’est pou rigoler. Quoque, chi cha arrife, cha n’va nin m’faire rigoler très longtimps ! In pus, te vas vir su ches menus : menu intre vingt-chinq et trinte euros chelon. Te vos l’ginre ! Bah ! J’sais bin que j’ne sus qu’eune moqueux d’gins, pach’que, su l’papier, cha march’te ! Dins l’réalité, in va dir’te que cha rich’qu’te d’ête gramint moins évidint. D’autint, qu’cha n’a rin d’obligatoire. In sait tertous ch’qui arriv’te quind in dit à un Français qu’cha n’est pon obligatoire. D’pus, t’iras dir’te à tous ches restaurateurs qui vienn’tent d’imprimer ches cartes pou ches vachinches, qu’is doiv’tent tout arfaire pach’que ches prix is n’sont pus bions. Allez, bionnes vacinches à ches juillettistes, in n’est pon prêt d’pus minger des sindouiches !